चाडपर्व लक्षित पटाका तस्करीविरुद्ध सशस्त्र प्रहरीको कडाइ, पर्साबाट ठूलो परिमाणमा प्रतिबन्धित विस्फोटक पदार्थ बरामद
पर्सा । चाडपर्व नजिकिँदै गएसँगै सीमावर्ती क्षेत्रमा बढ्न सक्ने अवैध गतिविधिमाथि निगरानी तीव्र बनाएको सशस्त्र प्रहरी बल, नेपालले पर्सा जिल्लाबाट ठूलो परिमाणमा प्रतिबन्धित विस्फोटक पदार्थ (पटाका) बरामद गरेको छ।मिति २०८३/०५/२३ गते पर्सामा सशस्त्र प्रहरीले सञ्चालन गरेको निगरानी तथा कारबाहीका क्रममा भारतबाट अवैध रूपमा भन्सार छली गरी नेपाल भित्र्याइएको विभिन्न प्रकारका पटाका बरामद गरिएको हो। सीमा क्षेत्रमा अवैध रूपमा भित्र्याइएका विस्फोटक तथा प्रतिबन्धित सामग्रीको ओसारपसार नियन्त्रण गर्ने क्रममा सशस्त्र प्रहरीले उक्त सामग्री नियन्त्रणमा लिएको जनाएको छ।चाडपर्वको समयमा पटाका तथा अन्य विस्फोटक सामग्रीको माग बढ्ने भएकाले सीमावर्ती नाकाहरू प्रयोग गरी भारतबाट नेपालतर्फ अवैध रूपमा पटाका भित्र्याउने क्रम बढ्न सक्ने भन्दै सुरक्षा निकायले सीमा क्षेत्रमा निगरानी तथा गस्तीलाई थप प्रभावकारी बनाएको छ।सशस्त्र प्रहरीले बरामद गरेका सामग्रीमा विभिन्न प्रकारका रङ्गीचङ्गी पटाका, झिरझिरे तथा ठूलो आवाज निकाल्ने अन्य विस्फोटक प्रकृतिका सामग्री रहेको जनाइएको छ। यस्ता सामग्रीको अवैध आयात, बिक्री–वितरण तथा प्रयोगले जनधनको सुरक्षा, वातावरण तथा सार्वजनिक शान्तिमा समेत असर पार्न सक्ने भएकाले सीमा क्षेत्रमा विशेष सतर्कता अपनाइएको सशस्त्र प्रहरीको भनाइ छ।भारतसँग खुला सीमा रहेको पर्सा जिल्लाका विभिन्न नाकाबाट चाडपर्वलाई लक्षित गरी अवैध रूपमा पटाका लगायतका प्रतिबन्धित सामग्री भित्रिन सक्ने सम्भावनालाई मध्यनजर गर्दै सुरक्षा निकायले नियमित गस्ती, चेकजाँच तथा निगरानी बढाएको छ। सोही क्रममा शंकास्पद गतिविधिमाथि निगरानी राख्दै सशस्त्र प्रहरीले ठूलो परिमाणमा पटाका नियन्त्रणमा लिन सफल भएको हो।बरामद गरिएका पटाका तथा अन्य विस्फोटक सामग्री आवश्यक कानुनी तथा प्रशासनिक कारबाहीका लागि सम्बन्धित निकायमा बुझाउने प्रक्रिया अघि बढाइएको सशस्त्र प्रहरी बल, नेपाल पर्साले जनाएको छ।सशस्त्र प्रहरीले चाडपर्वको समयमा सीमा क्षेत्रमा हुने अवैध तस्करी, चोरी–पैठारी तथा प्रतिबन्धित वस्तुको ओसारपसार नियन्त्रणका लागि निगरानीलाई निरन्तरता दिने जनाएको छ। साथै, अवैध रूपमा विस्फोटक पदार्थ भित्र्याउने, भण्डारण गर्ने तथा बिक्री–वितरण गर्ने गतिविधिमाथि समेत कानुनअनुसार कारबाही गरिने बताइएको छ।सुरक्षा निकायले सर्वसाधारणलाई समेत प्रतिबन्धित तथा जोखिमयुक्त पटाका प्रयोग नगर्न र सीमावर्ती क्षेत्रमा हुने अवैध गतिविधिबारे जानकारी भए सम्बन्धित सुरक्षा निकायलाई सूचना दिन आग्रह गरेको छ।
About The Author
