कोहलपुरको थापा पोलिक्लिनिकमा बिरामीको गोप्य अंग छोएको आरोप, पाँच सदस्यीय छानबिन समिति गठन
कोहलपुर । कोहलपुरस्थित थापा पोलिक्लिनिकमा उपचारका क्रममा बिरामीको गोप्य अंग छोएको आरोपसम्बन्धी घटनाको सत्यतथ्य छानबिन गर्न नेपाल स्वास्थ्य व्यवसायी परिषद्ले पाँच सदस्यीय छानबिन समिति गठन गरेको छ।परिषद्ले घटनाबारे प्राप्त आरोप तथा उजुरीको तथ्यगत अध्ययन गरी वास्तविकता पत्ता लगाउने उद्देश्यले समिति गठन गरेको जनाएको छ। समितिले घटनासँग सम्बन्धित पक्षसँग आवश्यक जानकारी लिने तथा उपलब्ध प्रमाण र कागजातको अध्ययन गरी प्रतिवेदन तयार गर्नेछ।यसै घटनासँग सम्बन्धित आरोपमा पोलिक्लिनिक सञ्चालक पक्राउ परी अनुसन्धान भइरहेको प्रहरीले जनाएको छ। प्रहरी अनुसन्धानसँगै परिषद्को छानबिन प्रक्रिया अघि बढेकाले घटनाको वास्तविकता अनुसन्धान र प्रतिवेदनबाट थप स्पष्ट हुने अपेक्षा गरिएको छ।घटनामा लगाइएको आरोप पुष्टि भइनसकेको अवस्थामा सम्बन्धित व्यक्तिलाई दोषी ठहर गर्न नमिल्ने कानुनी मान्यता रहेको छ। त्यसैले अनुसन्धान तथा छानबिनको निष्कर्ष आउनुअघि आरोपलाई आरोपकै रूपमा प्रस्तुत गर्नुपर्ने देखिन्छ।प्रहरी अनुसन्धान र स्वास्थ्य व्यवसायी परिषद्को छानबिन प्रतिवेदनपछि घटनाको तथ्य, जिम्मेवारी तथा आवश्यक कानुनी प्रक्रियाबारे थप स्पष्ट हुने बताइएको छ।
About The Author
