बाराबाट करिब ७ लाख रुपैयाँका अवैध सामान बरामद, तस्करीमा प्रयोग भएका मोटरसाइकल पनि नियन्त्रणमा
वीरगञ्ज । सशस्त्र प्रहरी बल नेपालले बाराको सीमा क्षेत्रमा सञ्चालन गरेको निगरानी तथा चेकजाँचका क्रममा करिब ७ लाख रुपैयाँ बराबरका अवैध सामान बरामद गरेको छ। भन्सार छली तथा अवैध चोरी–तस्करी नियन्त्रण गर्ने उद्देश्यले विभिन्न सीमा सुरक्षा इकाइबाट परिचालित टोलीले उक्त सामान बरामद गरेको हो।सशस्त्र प्रहरी बल नेपाल नं. १२ गण हेडक्वार्टर बाराअन्तर्गतका सी.सु. गुल्म पिपरपाती, बी.ओ.पी. बरैनिया तथा सी.सु. गुल्म मटिअर्वाबाट खटिएका टोलीले गरेको कारबाहीका क्रममा कस्मेटिक सामग्री, मदिरा, किराना तथा हार्डवेयरका सामान बरामद गरेका छन्। त्यस्तै, अवैध सामान ओसारपसारमा प्रयोग गरिएको आशंकामा मोटरसाइकलसमेत नियन्त्रणमा लिइएको सशस्त्र प्रहरीले जनाएको छ।सशस्त्र प्रहरी बल नेपाल नं. १२ गण हेडक्वार्टर बाराका सूचना अधिकारी सशस्त्र प्रहरी नायब उपरीक्षक विक्रममणि अधिकारीका अनुसार बरामद गरिएका सामानको कुल मूल्य करिब ७ लाख रुपैयाँ रहेको छ।बरामद सामग्री आवश्यक कानुनी प्रक्रिया पूरा गरी वीरगञ्ज भन्सार कार्यालयमा बुझाउने प्रक्रिया अघि बढाइएको उनले जानकारी दिए।सीमा क्षेत्रमा हुने भन्सार छली तथा अवैध चोरी–तस्करी नियन्त्रण गर्न सशस्त्र प्रहरीले नियमित गस्ती, निगरानी र चेकजाँचलाई प्रभावकारी बनाउँदै आएको जनाएको छ। सीमा क्षेत्रमा हुने गैरकानुनी गतिविधि नियन्त्रण गर्ने उद्देश्यले सुरक्षा निकायले निगरानी तथा कारबाहीलाई निरन्तरता दिइरहेको छ।
About The Author
