खेतमा फेला पर्यो शव, प्रेम विवादपछि क्रूर हत्या
जनकपुरधाम । धनुषामा प्रेम सम्बन्धका कारण १९ वर्षीय एक युवकको निर्मम हत्या भएको घटना सार्वजनिक भएको छ। हंसपुर नगरपालिका–९ रुदौलीका सुमित मण्डल औरही गाउँपालिका–६ स्थित खेतमा मृत अवस्थामा फेला परेका थिए। उनको घाँटी धारिलो हतियार प्रयोग गरी रेटिएको अवस्थामा भेटिएको प्रहरीले जनाएको छ।
जिल्ला प्रहरी कार्यालय धनुषा का अनुसार मृतक र स्थानीय एक किशोरीबीच करिब एक वर्षदेखि प्रेम सम्बन्ध रहेको प्रारम्भिक अनुसन्धानबाट खुलेको छ। परिवारको असहमति र त्यसबाट उत्पन्न आक्रोशका कारण हत्या गरिएको आशंका गरिएको छ।
प्रहरीले घटनामा संलग्न रहेको आरोपमा तीन जनालाई पक्राउ गरी सार्वजनिक गरेको छ। हत्या गर्न प्रयोग गरिएको खुकुरी, मोटरसाइकल तथा बाँध्न प्रयोग गरिएको सामग्री बरामद गरिएको प्रहरीले जनाएको छ।
घटनाबारे थप अनुसन्धान जारी रहेको छ भने मृतकका परिवारजनले दोषीमाथि कडा कारबाहीको माग गरेका छन्। यस घटनाले समाजमा प्रेम सम्बन्धप्रति पारिवारिक दृष्टिकोण र त्यसबाट उत्पन्न हिंसाबारे गम्भीर प्रश्न खडा गरेको छ।
About The Author
