७५ जिल्लामा निर्वाचन सामग्रीसहित मतपत्र ढुवानी सम्पन्न
आगामी निर्वाचनलाई लक्षित गर्दै देशका ७५ जिल्लामा आवश्यक निर्वाचन सामग्रीसहित मतपत्र पुर्याइएको छ। निर्वाचन आयोग नेपाल का अनुसार सुरक्षा निकायको समन्वयमा सबै जिल्लामा मतपत्र, मतपेटिका, छाप, मतदाता नामावली तथा अन्य आवश्यक सामग्री सुरक्षित रूपमा ढुवानी गरिएको हो।दुर्गम तथा पहाडी जिल्लामा हेलिकप्टर र विशेष सवारी साधन प्रयोग गरी सामग्री पुर्याइएको आयोगले जनाएको छ भने सुगम क्षेत्रमा सडक मार्गबाटै ढुवानी गरिएको छ। प्रत्येक जिल्लामा मुख्य निर्वाचन अधिकृतको कार्यालयमार्फत सामग्री सुरक्षित भण्डारण गरिएको र आवश्यक परेमा थप आपूर्ति गर्ने तयारी अवस्थामा राखिएको जानकारी दिइएको छ।सुरक्षा संवेदनशील क्षेत्रहरूमा नेपाल प्रहरी, सशस्त्र प्रहरी बल र नेपाली सेनाको निगरानी बढाइएको छ। आयोगले निर्वाचनलाई स्वच्छ, निष्पक्ष र शान्तिपूर्ण बनाउन सबै पक्षसँग सहयोगको अपिल समेत गरेको छ।मतदान मिति नजिकिँदै जाँदा स्थानीय तहदेखि जिल्ला तहसम्म तयारी तीव्र पारिएको छ। आयोगका अधिकारीहरूका अनुसार अब मतदान केन्द्र व्यवस्थापन, कर्मचारी खटाइने प्रक्रिया र मतदाता शिक्षाका कार्यक्रमलाई प्राथमिकता दिइएको छ।
About The Author
