बीरगन्ज–१५ नयाँ बस्तीमा ठूलो चोरी : ५० लाख बराबरका गरगहना र नगद लुटियो
बीरगन्ज महानगरपालिका–१५ नयाँ बस्तीस्थित एनआई क्लेज टोलमा करिब ५० लाख रुपैयाँ बराबरका गरगहना तथा नगद चोरी भएको छ। घरधनीसहित सम्पूर्ण परिवार काठमाडौं गएको मौका छोपी अज्ञात समूहले योजनाबद्ध रूपमा घरभित्र प्रवेश गरी लुटपाट गरेको प्रारम्भिक अनुसन्धानबाट खुलेको छ।
प्राप्त जानकारीअनुसार चोरीमा संलग्न व्यक्तिहरूले घरको ढोका तथा ताल्चा तोडफोड गरी भित्र रहेका सुन–चाँदीका बहुमूल्य गरगहना तथा ठूलो परिमाणको नगद रकम चोरी गरेका हुन्। लामो समय घर सुनसान रहेको अवस्थामा घटना घटाइएको आशंका गरिएको छ।
काठमाडौंबाट फर्किएपछि घरधनीले ढोका–ताल्चा फुटेको र घरभित्र रहेका बहुमूल्य सामग्रीहरू हराएको देखेपछि तत्काल प्रहरीलाई जानकारी गराएका थिए। सूचनापछि घटनास्थलमा पुगेको प्रहरीले मुचुल्का उठाई आवश्यक अनुसन्धान सुरु गरेको छ।
प्रहरीका अनुसार घटनास्थल वरपर रहेका सीसीटीभी फुटेजको अध्ययन, स्थानीयसँग सोधपुछ तथा प्राविधिक विश्लेषणमार्फत चोरीमा संलग्न व्यक्तिहरूको खोजी तीव्र पारिएको छ। यस घटनाले नयाँ बस्ती क्षेत्रका स्थानीयमा त्रास र असुरक्षाको भावना बढाएको छ भने चोरी नियन्त्रणका लागि सुरक्षा व्यवस्था कडा बनाउन मागसमेत उठ्न थालेको छ।
प्रहरीले चाँडै दोषी पहिचान गरी कानुनी दायरामा ल्याइने प्रतिबद्धता जनाएको छ।
About The Author
