भारत–नेपाल सीमा क्षेत्रमा SSB को ठूलो कारबाही, ५७.९ लिटर नेपाली मदिरासहित महिला पक्राउ
जयनगर (मधुबनी)। भारत–नेपाल सीमा क्षेत्रमा अवैध मदिरा तस्करीविरुद्ध सशस्त्र सीमा बल (SSB) ले ठूलो कारबाही गरेको छ। ४८औँ वाहिनी SSB जयनगरअन्तर्गत ‘F’ समवाय, मुख्यालय कमलाको विशेष नाका टोलीले सूचनाका आधारमा कारबाही गर्दै ५७.९ लिटर नेपाली मदिरासहित एक महिलालाई पक्राउ गरेको हो।
SSB का अनुसार अन्तर्राष्ट्रिय सीमा स्तम्भ नम्बर २७०/०८ बाट करिब ५०० मिटर भारतीय क्षेत्रमा विशेष निगरानी तथा घेराबन्दी गरिएको थियो। सो क्रममा नेपालतर्फबाट केही महिलाहरू बोरा तथा कपडामा सामान बोकेर भारतीय क्षेत्रमा प्रवेश गरिरहेको अवस्थामा देखिएका थिए।
सुरक्षा टोलीले उनीहरूलाई नियन्त्रणमा लिन घेराबन्दी गरेपछि एक महिला भाग्न सफल भएकी थिइन् भने अर्की महिलालाई नियन्त्रणमा लिन सफल भएको SSB ले जनाएको छ। पक्राउ परेकी महिलाको साथबाट १६३ बोतल नेपाली सोफी मदिरा (४८.९ लिटर) र ३० बोतल नेपाली ब्रिक्स मदिरा (९ लिटर) बरामद गरिएको छ।
पक्राउ परेकी महिलाको पहिचान ४० वर्षीया भग देवी, खेरा सिरवा, जिल्ला दरभंगाका रूपमा भएको छ। प्रारम्भिक सोधपुछका क्रममा उनले उक्त मदिरा नेपालको इनरवाबाट ल्याएर दरभंगा लैजान लागेको बताएको SSB ले जनाएको छ।
बरामद मदिरासहित पक्राउ परेकी महिलालाई थप कानुनी कारबाहीका लागि जयनगर प्रहरी थानामा बुझाउने प्रक्रिया अघि बढाइएको छ। साथै घटनास्थलबाट फरार भएकी अर्की महिलाको खोजी तथा सीमावर्ती क्षेत्रमा निगरानीसमेत बढाइएको जनाइएको छ।
सीमा क्षेत्रमा हुने अवैध मदिरा तथा अन्य सामानको तस्करी नियन्त्रणका लागि SSB ले नियमित गस्ती, निगरानी तथा विशेष नाका अभियानलाई निरन्तरता दिइरहेको जनाएको छ।
About The Author
