भोटेकोशी बाढीमा ज्यान गुमाएकाहरूको सम्झनामा बसन्तपुरमा दीप प्रज्वलन
काठमाडौं — भोटेकोशीमा आएको बाढीका कारण विभिन्न जिल्लामा भएको ठूलो जनधनको क्षतिप्रति दुःख व्यक्त गर्दै ज्यान गुमाएकाहरूको सम्झनामा काठमाडौंको बसन्तपुरमा दीप प्रज्वलन गरिएको छ।नेपाल चाइनिज गाइड एसोसिएसनको आयोजनामा सोमबार बसन्तपुरस्थित महादेव–पार्वती डबलीमा ‘हार्दिक श्रद्धाञ्जली तथा दीप प्रज्वलन’ कार्यक्रम आयोजना गरिएको हो। कार्यक्रममा भोटेकोशी बाढी तथा त्यसबाट प्रभावित विभिन्न जिल्लामा ज्यान गुमाएका व्यक्तिहरूप्रति श्रद्धाञ्जली अर्पण गर्दै दिवंगत आत्माको चिरशान्तिको कामना गरिएको थियो।कार्यक्रममा सहभागीहरूले बाढीका कारण भएको मानवीय क्षतिप्रति गहिरो दुःख व्यक्त गर्दै पीडित परिवारप्रति समवेदना प्रकट गरेका थिए। उनीहरूले विपद्का कारण आफन्त गुमाएका परिवारलाई धैर्यधारण गर्ने शक्ति मिलोस् भन्दै प्रार्थनासमेत गरेका थिए।भोटेकोशीमा आएको बाढीले विभिन्न क्षेत्रमा ठूलो क्षति पुर्याएपछि त्यसबाट प्रभावित नागरिकप्रति ऐक्यबद्धता जनाउँदै दीप प्रज्वलन गरिएको आयोजकले जनाएको छ। अन्धकारमा उज्यालोको प्रतीकका रूपमा दीप प्रज्वलन गर्दै दिवंगतहरूको स्मृतिलाई सम्मान गरिएको थियो।कार्यक्रममा सहभागीहरूले विपद्मा ज्यान गुमाउने सबैप्रति श्रद्धाञ्जली अर्पण गर्दै घाइते तथा प्रभावितहरूको शीघ्र उद्धार, उपचार र पुनःस्थापनाका लागि सम्बन्धित निकायको ध्यानाकर्षण गराएका थिए।बाढी, पहिरोलगायत प्राकृतिक विपद्का घटनाले जनधनको क्षति बढाइरहेका बेला पीडित परिवारको साथमा उभिनुपर्ने सन्देशसहित श्रद्धाञ्जली कार्यक्रम गरिएको आयोजकको भनाइ छ।दीप प्रज्वलन कार्यक्रममा प्रज्वलित दीपहरूले भोटेकोशी बाढीमा ज्यान गुमाएका तथा विपद्का कारण जीवन गुमाएका सबै व्यक्तिको सम्झना र सम्मानलाई उजागर गरेको थियो। सहभागीहरूले दिवंगत आत्माको चिरशान्तिको कामना गर्दै शोकसन्तप्त परिवारप्रति हार्दिक समवेदना व्यक्त गरे।
About The Author
