राजविराजमा अस्पतालबाहिरै सुत्केरी गराइएको घटनाको छानबिन गर्न मन्त्रालय र मेडिकल काउन्सिलको टोली जाँदै, दोषी देखिए कानुनबमोजिम कारबाही हुने
राजविराज । गजेन्द्रनारायण सिंह सगरमाथा अस्पताल परिसरबाहिरै एक महिलाले बच्चा जन्माएको घटनाप्रति स्वास्थ्य तथा खाद्य स्वच्छता मन्त्रालयले गम्भीर ध्यानाकर्षण जनाएको छ। घटनाको सत्यतथ्य छानबिन गर्न नेपाल मेडिकल काउन्सिलका रजिस्ट्रार डा. सुप्रभात श्रेष्ठ, एथिकल कमिटीका डा. अजय शाहसहित पाँच सदस्यीय टोली आजै राजविराज जाने भएको छ।मन्त्रालयका तर्फबाट उपचारात्मक सेवा महाशाखाका प्रमुख डा. पवनजंग रायमाझीसमेत छानबिन टोलीसँगै राजविराज जाने भएका छन्। मन्त्रालयले घटनाबारे अस्पतालसँग स्पष्टीकरणसमेत मागेको जनाएको छ।घटनाको स्थलगत छानबिन गरी वास्तविकता बाहिर ल्याइने तथा छानबिनका क्रममा दोषी देखिएमा सम्बन्धित व्यक्तिमाथि प्रचलित कानुनबमोजिम कारबाही गरिने मन्त्रालयले स्पष्ट पारेको छ।यसैबीच, घटनाबारे अस्पतालले पनि छुट्टै छानबिन समिति गठन गर्ने तयारी गरेको छ। स्वास्थ्य संस्थामा उपचारका लागि आउने कुनै पनि सेवाग्राहीलाई स्वास्थ्य सेवाबाट वञ्चित गर्न नहुने भन्दै मन्त्रालयले घटनालाई गम्भीरतापूर्वक लिएको जनाएको छ।
About The Author
