जबर्जस्ती श्रम रोक्न अमेरिकाको कडा कदम, ६० प्रमुख व्यापारिक साझेदारमाथि नयाँ ट्यारिफ
काठमाडौं। अमेरिकाले जबर्जस्ती श्रमबाट उत्पादित वस्तुको आयात नियन्त्रण गर्न पर्याप्त कदम नचालेको भन्दै आफ्ना ६० प्रमुख व्यापारिक साझेदार देशहरूमा नयाँ भन्सार शुल्क (ट्यारिफ) लागू गर्ने घोषणा गरेको छ।अमेरिकी व्यापार प्रतिनिधि जेमिसन ग्रियरका अनुसार राष्ट्रपति डोनाल्ड ट्रम्पको निर्देशनमा शुक्रबारदेखि १० देखि १२.५ प्रतिशतसम्मको नयाँ ट्यारिफ लागू हुनेछ। यो व्यवस्था बेलायत, चीन, भारत, पाकिस्तान, क्यानडा, जापान तथा युरोपेली सङ्घसहित अमेरिकाको कुल आयातको ९९.४ प्रतिशत हिस्सा ओगट्ने प्रमुख साझेदार देशहरूमा लागू गरिने जनाइएको छ।यसअघि लागू गरिएको अस्थायी १० प्रतिशत आयात करको अवधि समाप्त भएपछि ट्रम्प प्रशासनले सन् १९७४ को ‘ट्रेड एक्ट’ को सेक्सन ३०१ अन्तर्गत नयाँ ट्यारिफ संरचना अघि सारेको हो।ह्वाइट हाउसका अनुसार जबर्जस्ती श्रम नियन्त्रणमा प्रभावकारी प्रतिबद्धता जनाउने देशहरूलाई १० प्रतिशत र त्यस्तो प्रतिबद्धता नजनाउने देशहरूलाई १२.५ प्रतिशतसम्म भन्सार शुल्क लाग्नेछ।राष्ट्रपति ट्रम्पले यो कदमले अमेरिकी श्रमिकको संरक्षण, स्वदेशी उद्योगको प्रवर्द्धन तथा निष्पक्ष व्यापारिक प्रतिस्पर्धा सुनिश्चित गर्ने बताएका छन्। तर अर्थशास्त्रीहरूले उच्च भन्सार शुल्कका कारण आयातित वस्तुको मूल्य बढ्ने र त्यसको प्रत्यक्ष असर अमेरिकी उपभोक्तामाथि पर्ने चेतावनी दिएका छन्।यता प्रभावित देशहरू तथा विभिन्न व्यावसायिक समूहहरूले अमेरिकाको निर्णयविरुद्ध कानुनी चुनौती दिने र आवश्यक परे जवाफी भन्सार शुल्क लगाउने तयारी गरिरहेको जनाइएको छ।
About The Author
