पर्सामा ३७० किलो गाँजा बरामद, थप अनुसन्धानका लागि पोखरिया पठाइयो
वीरगञ्ज, असार ३ गते। पर्सा जिल्लाको छिपहरमाई गाउँपालिका–१ मिर्जापुरस्थित भलुहिया सडकखण्ड नजिकबाट प्रहरीले ठूलो परिमाणमा गाँजा बरामद गरेको छ।इलाका प्रहरी कार्यालय पोखरियाबाट प्राप्त जानकारीअनुसार प्रहरी सहायक निरीक्षक रामविनोद झाको कमाण्डमा खटिएको पैदल गस्ती टोलीले दशगजा क्षेत्र नजिक शंकास्पद स्थानमा खोजतलास गर्ने क्रममा बेवारिसे अवस्थामा राखिएको करिब ३७० किलोग्राम गाँजा फेला पारेको हो।प्रहरीका अनुसार उक्त गाँजा पानी बग्ने खोला तथा बबुल र आँपका रुखहरूको आसपास लुकाइछिपाइ राखिएको अवस्थामा भेटिएको थियो। सीमा क्षेत्रको संवेदनशील स्थानमा ठूलो परिमाणमा गाँजा फेला परेपछि प्रहरीले यसको स्रोत र संलग्न व्यक्तिहरूको खोजी तीव्र बनाएको जनाएको छ।बरामद गरिएको गाँजा आवश्यक कानुनी प्रक्रिया तथा थप अनुसन्धानका लागि इलाका प्रहरी कार्यालय पोखरियामा पठाइएको छ। घटनाबारे थप अनुसन्धान जारी रहेको प्रहरीले जनाएको छ।प्रहरीले लागूऔषध ओसारपसार तथा कारोबार नियन्त्रणका लागि सीमा क्षेत्र तथा संवेदनशील स्थानहरूमा निगरानी र गस्तीलाई अझ प्रभावकारी बनाइएको समेत जनाएको छ।
About The Author
