पथलैया–चुरियामाई सडक खण्डमा अतिक्रमण हटाउन सडक डिभिजन हेटौडाको सूचना
हेटौंडा — पूर्व–पश्चिम राजमार्गअन्तर्गत पथलैयादेखि चुरियामाईसम्म पर्ने विभिन्न स्थानमा सडक सीमा अतिक्रमण भएको भन्दै सडक डिभिजन कार्यालय हेटौडाले सीमा खाली गर्न सूचना जारी गरेको छ। कार्यालयले सडकको मापदण्डभित्र पर्ने संरचना, पसल तथा अन्य अवरोधहरू हटाउन सम्बन्धित पक्षलाई आग्रह गरेको हो।जारी सूचनामा तोकिएको समयभित्र सडक सीमाभित्र रहेका अस्थायी तथा स्थायी संरचना स्वयं हटाउन भनिएको छ। अन्यथा, अटेर गरेमा कानुनी प्रक्रिया अपनाई कार्यालयले नै हटाउने चेतावनी दिइएको छ। सडक विस्तार तथा मर्मत कार्यलाई प्रभावकारी बनाउन अतिक्रमण हटाउन आवश्यक भएको कार्यालयले जनाएको छ।उक्त सडक खण्ड देशकै व्यस्त मार्गमध्ये एक मानिन्छ, जहाँ दैनिक ठूलो संख्यामा सवारी साधन आवतजावत गर्ने गर्छन्। तर, सडक किनारमा बढ्दो अतिक्रमणका कारण सवारी आवागमनमा अवरोध, दुर्घटनाको जोखिम तथा ट्राफिक व्यवस्थापनमा समस्या उत्पन्न हुँदै आएको छ।सडक डिभिजन कार्यालयले यस अभियानलाई प्रभावकारी बनाउन स्थानीय तह, सुरक्षा निकाय तथा सरोकारवाला निकायसँग समन्वय गरी अघि बढ्ने जनाएको छ। साथै, नागरिकलाई समेत सार्वजनिक सम्पत्तिको संरक्षणमा सहयोग गर्न अपिल गरिएको छ।
About The Author
