स्मार्ट पुलिस अवधारणामा नयाँ फड्को: पर्सामा डिजिटल शौचालय सेवा सुरु
वीरगञ्ज, २३ चैतपर्सा जिल्लामा स्मार्ट पुलिस अवधारणालाई थप सुदृढ बनाउँदै आधुनिक डिजिटल प्रविधियुक्त स्नान तथा शौचालय भवनको उद्घाटन गरिएको छ। जिल्ला प्रहरी कार्यालय पर्साको परिसरमा निर्माण गरिएको उक्त सुविधा प्रहरी कर्मचारीहरूको स्वच्छता, स्वास्थ्य तथा कार्यक्षमता अभिवृद्धि गर्ने उद्देश्यले स्थापना गरिएको हो।“स्वच्छता नै स्वास्थ्यको आधार हो” भन्ने मूल मन्त्रलाई आत्मसात गर्दै नेपालमै पहिलो पटक डिजिटल प्रणालीसहितको अत्याधुनिक शौचालय सेवा सञ्चालनमा ल्याइएको हो। सोमबार आयोजित विशेष कार्यक्रममा उक्त भवनको औपचारिक उद्घाटन गरिएको हो।कार्यक्रममा प्रहरी उपरीक्षक सुदीप राज पाठकको प्रमुख आतिथ्यता रहेको थियो। कार्यक्रममा बोल्दै उनले यस्तो आधुनिक पूर्वाधारले प्रहरी कर्मचारीहरूको स्वास्थ्य र कार्यसम्पादनमा सकारात्मक प्रभाव पार्ने विश्वास व्यक्त गरे। साथै, उनले निर्माण कार्यमा सहयोग पुर्याउने रुङ्गटा वेलफेयर सोसाइटी तथा ग्रीन सिटी सामुदायिक प्रहरी सेवा केन्द्र आदर्शनगरप्रति विशेष आभार व्यक्त गरे।उक्त कार्यक्रममा ग्रीन सिटी सामुदायिक प्रहरी सेवा केन्द्र आदर्शनगरका अध्यक्ष जय प्रकाश खेतान, रुङ्गटा वेलफेयर सोसाइटीका कोषाध्यक्ष सुरेश रुङ्गटा, लायन्स क्लब आदर्शनगरका प्रकाश बाहेती लगायत विभिन्न संघ–संस्थाका प्रतिनिधि तथा सुरक्षाकर्मीहरूको उल्लेखनीय उपस्थिति रहेको थियो।कार्यक्रममा बोल्दै अध्यक्ष जय प्रकाश खेतानले प्रहरी कर्मचारीहरूको आधारभूत आवश्यकतालाई सम्बोधन गर्ने यस्ता पूर्वाधार निर्माण अत्यन्त सराहनीय कदम भएको बताए। उनले स्वच्छता र स्वास्थ्यबीचको गहिरो सम्बन्धलाई उल्लेख गर्दै यस्तो डिजिटल सुविधा युक्त संरचनाले दैनिक कार्यजीवनलाई सहज बनाउने विश्वास व्यक्त गरे।नव-निर्मित उक्त भवनले प्रहरी कर्मचारीहरूलाई स्वच्छ, सुरक्षित र आधुनिक सुविधा सम्पन्न वातावरण प्रदान गर्ने अपेक्षा गरिएको छ। साथै, समुदाय र सुरक्षाकर्मीबीचको सहकार्यलाई अझ मजबुत बनाउन यस्ता योजनाहरू प्रभावकारी हुने विश्वास गरिएको छ।अध्यक्ष खेतानले आगामी दिनमा पनि सामाजिक उत्तरदायित्व अन्तर्गत यस्ता रचनात्मक तथा जनहितका कार्यहरूमा निरन्तर सहयोग रहने प्रतिबद्धता समेत व्यक्त गरे।
About The Author
