जिल्ला प्रहरी कार्यालय पर्साले बैंकिङ कसुर मुद्दामा लामो समयदेखि फरार रहेका एक प्रतिवादीलाई पक्राउ गर्न सफलता हासिल गरेको छ। विशेष सूचनाको आधारमा सञ्चालन गरिएको खोजतलास तथा निगरानी अभियानका क्रममा फरार अभियुक्तलाई नियन्त्रणमा लिइएको प्रहरीले जनाएको छ।अदालतबाट दोषी ठहर भई सजाय तोकिएपछि फरार रहेका वीरगञ्ज महानगरपालिका–११ निवासी ३२ वर्षीय अमित कुमार गुप्तालाई प्रहरीले पक्राउ गरेको हो। उनीविरुद्ध चेक बाउन्स तथा आर्थिक ठगीसम्बन्धी कसुरमा जिल्ला अदालतले १ वर्ष कैद सजाय र करिब ५ लाख रुपैयाँभन्दा बढी जरिवाना तोकेको थियो।फैसला पश्चात लामो समयसम्म फरार रही कानुनी कारबाहीबाट बच्दै आएका उनलाई जिल्ला प्रहरी कार्यालय पर्साबाट खटिएको टोलीले वीरगञ्जस्थित सडक क्षेत्रमा फेला पारी नियन्त्रणमा लिएको हो। पक्राउ पश्चात आवश्यक कानुनी प्रक्रिया पूरा गरी उनलाई जिल्ला अदालत पर्सामा उपस्थित गराइएको प्रहरीले जानकारी दिएको छ।प्रहरीका अनुसार आर्थिक अपराध, बैंकिङ ठगी तथा फरार अपराधीविरुद्ध विशेष अभियान निरन्तर सञ्चालन भइरहेको छ। यस प्रकारका वित्तीय अपराधले सर्वसाधारणको आर्थिक सुरक्षामा प्रत्यक्ष असर पार्ने भएकाले कडाइका साथ कारबाही जारी रहने स्पष्ट पारिएको छ।जिल्ला प्रहरी कार्यालय पर्साले नागरिकलाई चेक कारोबार तथा बैंकिङ लेनदेन गर्दा सतर्क रहन, शंकास्पद गतिविधि देखिएमा तुरुन्त प्रहरीलाई जानकारी गराउन अनुरोध गरेको छ।
About The Author
