४ चैत, वीरगञ्ज
पर्साको वीरगञ्ज महानगरपालिका–१६ मा घटिरहेको एक घटनाले कानुनी शासनमाथि गम्भीर प्रश्न खडा गरेको छ। अदालतको आदेश हुँदाहुँदै पनि एक पीडित परिवारमाथि निरन्तर कुटपिट र धम्की भइरहेको आरोप छ, तर प्रहरी प्रशासन भने मौन बसेको पीडितको गुनासो छ।पीडिता खुश्बू श्रीवास्तवका अनुसार, भारतको बिहार राज्यबाट आएका केही व्यक्तिहरूले बिना स्पष्ट कारण बारम्बार घरमै पसेर आक्रमण गर्ने, गालीगलौज गर्ने र ज्यान मार्ने धम्की दिने गरेका छन्। “हामीसँग कुनै व्यक्तिगत विवाद छैन, तर योजनाबद्ध रूपमा आक्रमण भइरहेको छ,” उनले बताइन्।घटनाका क्रममा उनका श्रीमान् गम्भीर घाइते भएका छन्। एक आक्रमणमा उनको दाहिने कानको करिब ७० प्रतिशत श्रवणशक्ति गुमेको दाबी गरिएको छ भने अर्को घटनामा इँटा–ढुंगाको प्रहारबाट गम्भीर चोट लागेको छ। ज्यान जोगाउन गएका वृद्ध ससुरासमेत घाइते भएका छन्।पीडितका अनुसार उच्च अदालत जनकपुर, अस्थायी इजलास वीरगञ्जको सुरक्षा सम्बन्धी आदेशसमेत उल्लंघन गरिएको छ। अदालतले संरक्षणका लागि आदेश दिए पनि आरोपितहरू झन् सक्रिय हुँदै पुनः आक्रमणमा उत्रिएको दाबी गरिएको छ।पीडित परिवारले जिल्ला प्रहरी कार्यालय पर्सा, वडा प्रहरी कार्यालय बिर्ता लगायत विभिन्न निकायमा उजुरी दिँदा पनि प्रभावकारी अनुसन्धान नभएको र उल्टै मिलेमतो भएको आशंका गर्नुपर्ने अवस्था आएको बताएका छन्।बसपार्क प्रहरी चौकीदेखि नारायणी अस्पतालसम्म धाउँदा पनि न्याय नपाएको गुनासो पीडितले गरेका छन्। मेडिकल रिपोर्ट, घाइते प्रमाण र निवेदन हुँदाहुँदै पनि दोषीहरू खुलेआम घुमिरहेको भन्दै प्रहरीको भूमिकामाथि प्रश्न उठाइएको छ।जिल्ला प्रहरी प्रमुखले छानबिनका लागि निर्देशन दिएको भनिए पनि महिनौँ बित्दा समेत कुनै ठोस प्रगति नदेखिएको पीडितको आरोप छ।यस घटनाले अदालतको आदेश कार्यान्वयन, पीडितको सुरक्षा र प्रहरी प्रशासनको भूमिकामाथि गम्भीर प्रश्न खडा गरेको छ।
About The Author
