काठमाडौं फागुन २१ गतेका लागि तय गरिएको प्रतिनिधि सभाको निर्वाचनमा उम्मेदवार मनोनयन दर्ताको समय थप्ने तयारी निर्वाचन आयोगले थालेको छ। निर्वाचनमा सहभागी राजनीतिक दलहरूलाई उम्मेदवार छनोट गर्न पर्याप्त समय नपुगेको भन्दै मनोनयन दर्ताको मिति केही दिन सार्नुपर्ने दबाब बढेपछि आयोग यस विषयमा छलफलमा जुटेको हो।आयोगका एक आयुक्तका अनुसार औपचारिक निर्णय हुन बाँकी रहे पनि मनोनयन दर्ताको समय केही दिन थप्ने विषयमा आयोगभित्र सकारात्मक छलफल भइसकेको छ। राजनीतिक दलहरूबाट औपचारिक तथा अनौपचारिक रूपमा समय थप्न आग्रह आइरहेकाले आयोगले यसलाई गम्भीरतापूर्वक लिएको उनले बताए।दलहरूको आन्तरिक तयारी, गठबन्धनबीचको सहमति र उम्मेदवार छनोट प्रक्रियामा देखिएको समय अभावलाई ध्यानमा राख्दै आयोग लचक देखिएको स्रोतको भनाइ छ। आयोगले दलहरूसँग छलफल गरी सर्वदलीय सहमति जुटेमा मनोनयन दर्ताको समय एक–दुई दिनसम्म थप्न सकिने जनाएको छ।यद्यपि निर्वाचन कार्यतालिका प्रभावित नहुने गरी मात्रै निर्णय गरिने आयोगको स्पष्टता छ। यस विषयमा छिट्टै औपचारिक निर्णय सार्वजनिक गरिने अपेक्षा गरिएको छ।
About The Author
